പ്രവാസി പ്രവർത്തനങ്ങൾക്ക് അംഗീകാരം : 'മീറ്റ് ദ ലീഡർ' സംവാദത്തിൽ ബി.ആർ.എം. ഷഫീർ
ജിദ്ദ: വിദേശ രാജ്യങ്ങളിലിരുന്ന് നടത്തുന്ന പാർട്ടി പ്രവർത്തനങ്ങളെ നിസാരമായി കാണരുത് എന്ന് കെ.പി.സി.സി. സെക്രട്ടറി ബി.ആർ.എം. ഷഫീർ.
ഒ.ഐ.സി.സി. വെസ്റ്റേൺ റീജിയണൽ കമ്മറ്റിയുടെ ‘മീറ്റ് ദ ലീഡർ’ സംവാദത്തിൽ സംസാരിക്കുകയായിരുന്നു അദ്ദേഹം. പ്രവാസി പ്രവർത്തകരുടെ സേവനങ്ങളെ പാർട്ടിക്ക് ഒഴിച്ചുകൂടാനാവാത്തതാണെന്നും അവരുടെ സംഭാവനകൾക്ക് വേണ്ടത്ര അംഗീകാരം ലഭിക്കണമെന്നും ഷഫീർ പറഞ്ഞു.
സംവാദത്തിൽ പങ്കെടുത്ത പ്രവർത്തകർ താഴെത്തട്ടിലുള്ള പാർട്ടി പ്രവർത്തനം ശക്തിപ്പെടുത്തുന്നതിന് ആവശ്യമായ നടപടികൾ സ്വീകരിക്കണമെന്ന് നേതൃത്വത്തോട് ആവശ്യപ്പെട്ടു. പാർട്ടിക്കും അണികൾക്കും പ്രതിസന്ധികൾ ഉണ്ടാകുമ്പോൾ മുഖം തിരിഞ്ഞുനിൽക്കുന്ന നേതാക്കന്മാരെ പാർട്ടി നേതൃത്വം തിരിച്ചറിഞ്ഞ് മുന്നോട്ട് പോകണം എന്നും അഭിപ്രായമുയർന്നു. അങ്ങനെയെങ്കിൽ സാധാരണ അണികൾക്ക് ഒരു സംശയവും കൂടാതെ പാർട്ടിക്കുവേണ്ടി പ്രവർത്തിക്കാൻ സാധിക്കും എന്നും അവർ ചൂണ്ടിക്കാട്ടി.
ജിദ്ദയിലെ നൂറോളം പാർട്ടി നേതാക്കന്മാർ പങ്കെടുത്ത ഈ പരിപാടിയിൽ, ഒ.ഐ.സി.സി. വെസ്റ്റേൺ റീജിയണൽ കമ്മറ്റിയുടെ പ്രസിഡൻ്റ് ഹക്കീം പാറക്കൽ അധ്യക്ഷനായിരുന്നു. പ്രവർത്തകരുമായി നേരിട്ട് സംവദിക്കാനും അവരുടെ അഭിപ്രായങ്ങൾ കേൾക്കാനും ഈ വേദി സഹായകമായി എന്ന് പ്രവർത്തകർ അഭിപ്രായപെട്ടു.
